தலைமைச் செயலகத்திலிருந்து ஓர் அழைப்பு

வாசகர்களோடு 'அருஞ்சொல்' சார்ந்த நகர்வுகளை ஆசிரியர் பகிர்ந்துகொள்ளும் வகையில் 'ஆசிரியரிடமிருந்து' பகுதி வெளியிடப்படுகிறது. நேரடி அறிவிப்புகள் போக கூட்டங்கள், சமூகவலைதளங்கள் வழி ஆசிரியர் பகிர்ந்துகொள்ளும் 'அருஞ்சொல்' தொடர்பான செய்திகளும் இங்கே இடம்பெறும்.

சற்றுமுன் ஒரு அழைப்பு. தலைமைச் செயலகத்திலிருந்து பேசுவதாக சொன்ன ஊழியர் தலைமைச் செயலர் பேச விரும்புவதாகக் கூறி, அழைப்பை இணைத்தார். 

தலைமைச் செயலர் திரு. இறையன்பு பேசினார். சமீபத்தில் 'அருஞ்சொல்' இதழில் வெளியான 'திராவிட மாதிரி எதிர்கொள்ளும் சவால்!' தலையங்கத்தையும், 'தமிழ்நாட்டின் பிஹார், உபி மாவட்டங்களை என்ன செய்யப்போகிறோம்?' கட்டுரையையும் அரசு தீவிரமாக எடுத்துக்கொண்டதாகக் கூறியவர், இன்று நடந்த அரசு செயலர்கள் கூட்டத்தில் அதை மையமாகக் கொண்டு விவாதித்ததாகத் தெரிவித்தார். 

தமிழ்நாட்டின் சில மாவட்டங்கள் ஆப்பிரிக்கா, உபி, பிஹார் சூழலுடன் ஒப்பிடத்தக்க அளவுக்கு மோசமாக இருப்பதையும், பிராந்தியரீதியாக தமிழகத்தில் நிலவும் ஏற்றத்தாழ்வையும் விரிவாகச் சுட்டிக்காட்டும் தலையங்கம், கட்டுரை அவை. 

இந்த ஏற்றத்தாழ்வைப் போக்கும் வகையில் அரசின் கொள்கைகள் நடவடிக்கைகள் அமையும் என்று கூறிய அவர் துறைவாரியாக இது சம்பந்தமான நடவடிக்கைகள் அமையும் என்றும் தெரிவித்தார்.

சொற்கள் காரியங்கள் ஆகும் நாளில், தமிழகத்தின் அடுத்தகட்ட வளர்ச்சிக்கான பெரும் நடவடிக்கைகளில் ஒன்றுக்கான அடிக்கல்லாக இன்றைய கூட்டம் அமையும் என்று எண்ணுகிறேன்.

தொடர்ந்து 'அருஞ்சொல்' சுட்டும் விஷயங்களுக்கு அரசு உரிய கவனம் அளிப்பதும், தொடர்ந்து நடவடிக்கைகள் மேற்கொள்ளப்படுவதும் உவகை தருகிறது. விமர்சனங்களுக்குத் திறந்த மனதுடன் காது கொடுக்கும் தமிழக அரசின் இத்தகு அணுகுமுறை தொடர வேண்டும். 

தமிழக முதல்வர், தலைமைச் செயலர் மற்றும் இது சார்ந்த நடவடிக்கைகளோடு தொடர்புடைய அனைவருக்கும் மனம் நிறைந்த நன்றி. மிக முக்கியமான ஒரு பிரச்சினையைப் புள்ளிவிவரங்களுடன் அணுகிய கட்டுரையாளர் மூர்க்குமாவுக்கு வாழ்த்துகள்?

தொடர்புடைய பதிவுகள்

திராவிட மாதிரி எதிர்கொள்ளும் சவால்!

தமிழ்நாட்டின் பிஹார், உபி மாவட்டங்களை என்ன செய்யப்போகிறோம்?